اسلام آباد(اسٹاف رپورٹ) وفاقی حکومت نے خواتین کی بنیادی ضروریات کو مدنظر رکھتے ہوئے سینیٹری مصنوعات پر عائد ٹیکس ختم کرنے کا اعلان کیا ہے۔ اس فیصلے کو خواتین کے لیے ایک اہم اور مثبت اقدام قرار دیا جا رہا ہے۔حکومتی حکام کے مطابق اس اقدام کا مقصد خواتین کی صحت، سہولت اور معاشی بوجھ میں کمی لانا ہے۔ سینیٹری مصنوعات پر ٹیکس کے خاتمے سے نہ صرف ان اشیاء کی قیمتوں میں کمی آئے گی بلکہ عام خواتین کو بھی براہ راست ریلیف حاصل ہوگا۔سماجی حلقوں اور خواتین کے حقوق کے لیے کام کرنے والی تنظیموں نے اس فیصلے کا خیر مقدم کیا ہے اور اسے ایک دیرینہ مطالبے کی تکمیل قرار دیا ہے۔ ماہرین کے مطابق یہ قدم پاکستان میں خواتین کی صحت اور آگاہی کے حوالے سے مثبت تبدیلی کا آغاز ثابت ہو سکتا ہے۔