تحریر: سیدہ نصرت نقوی
آیت‌الله حاج سید مجتبی خامنہ‌ای – علمی بصیرت اور روحانی رہنمائی کے حامل شخصیت ہیں ابتدائی زندگی اور خاندانی پس منظر
آیت‌الله حاج سید مجتبی خامنہ‌ای، شہید مرجع اور رہبر سید علی خامنہ‌ای کے دوسرے بیٹے ہیں۔ وہ سن 1969ء (1348 ہجری شمسی) میں مقدس شہر مشہد میں پیدا ہوئے۔ ان کا تعلق ایک انتہائی مذہبی اور علمی خاندان سے ہے، جہاں دینی تعلیم اور روحانی تربیت کو ہر فرد کی زندگی کا لازمی حصہ سمجھا جاتا ہے۔
تعلیمی آغاز اور ابتدائی حوزوی تعلیم
سید مجتبی خامنہ‌ای نے اپنی ابتدائی دینی تعلیم آیت‌الله مجتهدی تهرانی کے مدرسہ میں حاصل کی۔ انہوں نے کم عمری ہی سے دینی علوم میں گہری دلچسپی ظاہر کی اور فقہ، اصول اور دیگر اسلامی علوم میں اپنے ذہن کی صلاحیتوں کا ثبوت دیا۔
ایران-عراق جنگ میں کردار
ایران-عراق جنگ کے دوران انہوں نے محاذِ جنگ پر مجاہدین کے ساتھ رہ کر وطن اور دین کی خدمت کا عملی مظاہرہ کیا۔ جنگ کے دوران حاصل شدہ تجربات نے ان کی شخصیتی اور روحانی تربیت کو مزید مضبوط کیا اور ان میں اسلامی اصولوں کے لیے بے پناہ جذبہ پیدا کیا۔
قم میں اعلیٰ دینی تعلیم
جنگ کے اختتام کے بعد، 1989ء میں، سید مجتبی خامنہ‌ای نے مزید اعلیٰ سطح کی دینی تعلیم کے لیے قم کا سفر کیا۔ وہاں انہوں نے 1992ء تک مقیم رہ کر حوزوی علوم میں مہارت حاصل کی۔ 1992ء میں پانچ سال کے لیے تہران واپس آئے اور وہاں اپنی دینی تعلیم جاری رکھی، جہاں وہ علمی اور فکری سرگرمیوں میں بھرپور حصہ لیتے رہے۔1997ء میں انہوں نے زهرا حداد عادل سے شادی کی۔ اسی سال مزید روحانی فیوض اور علمی تربیت کے لیے دوبارہ قم ہجرت کر گئے۔ قم میں انہوں نے ممتاز اساتذہ جیسے احمدی میانه‌جی، رضا استادی، اوسطی اور دیگر بزرگ علماء سے اعلیٰ سطح کے دروس حاصل کیے۔
علمی تربیت اور تدریسی خدمات
سید مجتبی خامنہ‌ای نے فقہ و اصول کے خارج کے دروس اپنے والد سید علی خامنہ‌ای کے علاوہ بزرگ علماء جیسے:
شیخ جواد تبریزی
حسین وحید خراسانی
سید موسی شبیری زنجانی
مجتبی تهرانی
محمد مؤمن قمی
سے بھی پڑھے۔ انہوں نے 17 سال سے زائد عرصے تک خارجِ فقہ و اصول کے دروس میں باقاعدگی سے تدریسی سرگرمیوں میں حصہ لیا۔ عربی زبان میں علمی تقریرات پیش کرنا، اساتذہ کے ساتھ علمی نکات پر بحث و تنقید کرنا، اور طلبہ کی تربیت کرنا ان کی علمی زندگی کا حصہ رہا۔
علمی نظریات اور فکری خدمات
سید مجتبی خامنہ‌ای کی علمی خصوصیات میں درج ذیل پہلو نمایاں ہیں:
حوزوی علوم میں نیا اور مضبوط فکری نظریات پیش کرنا
فقہ، اصول اور رجال میں منظم فکری بنیادیں قائم کرنا
علمی آزادی کے ساتھ تحقیق اور تدریس کرنا
اسلامی علوم کے مختلف شعبوں میں مستقل اور مربوط علمی کام کرنا
ان کی محنت اور ذہانت نے انہیں نہ صرف علمی دائرے میں ممتاز کیا بلکہ طلبہ اور علماء کے درمیان احترام و اعتماد کا مقام بھی دیا۔
روحانی بصیرت اور سماجی اثرات۔
سید مجتبی خامنہ‌ای نہ صرف ایک عالم اور محقق ہیں بلکہ روحانی رہنمائی کے بھی اہل ہیں۔ ان کی شخصیت میں علمی گہرائی اور روحانی بصیرت کا حسین امتزاج پایا جاتا ہے۔ وہ نہ صرف طلبہ کی تربیت کرتے ہیں بلکہ معاشرتی اور دینی خدمات میں بھی فعال کردار ادا کر رہے ہیں، خاص طور پر نوجوانوں کی فکری اور اخلاقی تربیت کے لیے۔
آیت‌الله حاج سید مجتبی خامنہ‌ای ایک جامع اور کامل شخصیت کے حامل ہیں، جن کی زندگی علم، تحقیق، تدریس اور روحانی خدمت سے عبارت ہے۔ ان کی علمی بصیرت، محنت، اور فکری آزادی نے انہیں حوزوی علوم میں ایک ممتاز مقام عطا کیا ہے۔ وہ نہ صرف اسلامی تعلیمات کے فروغ کے علمبردار ہیں بلکہ ایک رہبر، معلم اور فکری رہنمائی کے مستحق بھی ہیں، جو آنے والی نسلوں کے لیے مشعل راہ ثابت ہوں گے۔
رہبر معظم انقلاب اسلامی ایران آیت العظمی سید خامنہ ای کی شھادت کے بعد اب ان کے بیٹے سید مجتبی خامنہ ای رہبر ایران ہیں خدا انہیں طول عمر اور صحت مند زندگی کیساتھ دین اسلام اور انقلاب اسلامی ایران کی حفاظت کیساتھ زندہ و جاوداں رکھے الٰہی امین۔